മെലിയൽ

ഒരിക്കൽ ഞാൻ വല്ലാതങ്ങ്
മെലിഞ്ഞുപോയി,
ഒരു കള്ളവാറ്റുകാരനെയോ,
കഞ്ചാവ് കച്ചവടക്കാരനെയോ
മുച്ചീട്ടുകളിക്കാരനെയോ നോക്കുന്നപോലെ
നിങ്ങൾ എന്നെ നോക്കി.
പിന്നെയും മെലിഞ്ഞപ്പോൾ
എന്റെ ശരീരത്തിൽ
ഒരു കള്ളൻ വിരിഞ്ഞു.

പിന്നീട് ഞാൻ വണ്ണം വയ്ക്കാൻ തുടങ്ങി
അപ്പോൾ നിങ്ങളെനിക്കൊരു
കൂട്ടിക്കൊടുപ്പുകാരനുള്ള
മാന്യത തന്നു.
പിന്നെയും തടിച്ചപ്പോൾ ഞാൻ,
നിങ്ങൾക്കൊരു അന്പരപ്പായി.

ഞാനിപ്പോൾ ഒരു 'വഴികണ്ടെത്താമോ'
പ്രശ്നത്തിന് മുന്നിലാണ്.
എന്റെ പഴയ രൂപത്തിലേക്കുള്ള വഴി.