പെന്‍സില്‍

അടുക്കളപ്പടിയിലിരുന്ന്

വലതു കൈവെള്ളയില്‍ വെച്ച്

ഇടതു കൈയിലെ

ബ്ലെയിഡു കൊണ്ട്

ചെത്തി നീര്‍പ്പിച്ച്

ഇല്ലാതാക്കിയിട്ടുണ്ട്

ഞാനൊരു പെന്‍സിലിനെ.

ഓരോ ചെത്തലിനും

ബാക്കിയാകുന്ന തടിക്കഷണങ്ങള്‍

നെടുവീര്‍പ്പിടുന്നുണ്ട്

ഏതൊക്കെയോ മരങ്ങളെ നോക്കി,

ഇതെന്റേതെന്ന് ചൂണ്ടി

തിരിച്ച് പിടിക്കാവുന്ന മരങ്ങള്‍

ഇനിയെവിടുന്നു കിട്ടും

ഈ തടിക്കഷണങ്ങള്‍ക്ക്

എത്ര വിയര്‍ത്തൊലിച്ചാലാകും

ഈ കാര്‍ബണിന്

ഒരു കൈയ്‌ക്കൊപ്പം

ഓടിയെത്താനാകുക.

എത്ര ശപിച്ചാലാകും

ഉരഞ്ഞു തീരുന്ന പേപ്പറിനെ

കത്തിച്ചില്ലാതാക്കാനാകുക.

പെന്‍സില്‍ കൊണ്ടുള്ള

ഓരോ എഴുത്തിലും

വിശുദ്ധയാകുന്ന പേപ്പര്‍

ഇനി എവിടേയ്ക്ക് നടക്കണം

ഒന്നുകൂടി വേരു പിടിയ്ക്കാന്‍.